Geguritan Ratmaya Urip

Kapang (2)
Geguritan: Ratmaya Urip


Rosaning rasa kapangku
Kang tanpa nduweni pungkasaning wektu
Tansah mijil nglangkahi jejering kalbu
Mbludag ngebaki tresna kang tan kendat tansah lumaku
Sak indenging wektu
Sak entekeing ambeganku kang tansah mbludag ginawa tuhu
Karengkuh ing pawana lan bayu
Kairing paksi kang tansah telaten memayu
Tumrap jatining rasa ati kang tanpa watesing laku

Rasa kapang mring sliramu
Marang esem kang ngujiwat lan guyu kang lumayu
Uga kapang marang warpamu kang ora nduweni buntu
Tansah memayu hayuning tunggu
Senadyan ora ngerti kapan isa ketemu

Aku nyenyuwun muga kapangku enggal sirna
Binareng blegering sunyata
Lumantar pisahing raga marga pada-pada karengkuh sisihan kang beda
Kairing banjiring kuciwa lan udaning waspa lumebering bantala
Binareng pupusing warta kang luwih saka sawetara
Ananging kapang iki tansah adoh ing pungkasan lan tansah cedak ing purwaka

Sidoarjo, Senin, 26 Desember 2011

Geguritan Ratmaya Urip

Kapang (1)
Geguritan: Ratmaya Urip


Yayi,

Rina-rina trusing ratri kang wus lumampah tedak ing yuswa

Tan ana kang kuwagang nglengserake blegering rasa

Kang saya ngrembuyung lan nyengkuyung rasa kapang kang nyata

Kang angel banget ilang saka jroning jaja

Kang ora nate leren amarga tansah ngugemi sejatining tresna

Tanpa sadumuk lirwa




Prasasti kang nate kawedar lan kadeder duk ing nguni

Tansah paring penget lan tansah bali

Nyurung krenteging ati

Mring rasa kang kebak aji tanpa risi

Kepengin njumbuhake kapang iki

Kang saya gemrojok ngebaki punagi


Sidoarjo, Senin, 26 Desember 2011 09:57

Geguritan, Mangayubagya Rina Kanggo Biyung

Biyung,


Ing garbamu aku nate ngrasakake angeting katresnanmu

Uga ademing panggulawentahmu

Kang tanpa upama nglejarake langkahku tumuju ing karaharjan tanpa ninggalake paugeran lan kasusilan

Ing waspamu kang nyimpen luhuring bebana aku kaajap bisa dadi jalma kang utama

Aku kapang, Biyung

Marang pangajapmu kang ora nate kendat paring pandonga kanggo jembar lan lancare langkah-langkahku

Sidoarjo, 22 Desember 2011